Белгили шаирибиз Йырчы Къазакъны 180 йыллыгъына багъышлангъан адабият байрам Къызылюртдагъы 4 номерли школада да оьтгерилди. Мунда шагьардагъы школаланы къумукъ тилден дарс береген муаллимлери, китапханаланы ёлбашчылары ва шагьарны билим берив бёлюгюню методистлери де бар эди.

Бу шатлы жыйынгъа дагъы да Дагъыстан пачалыкъ педагогика университетни дагъыстан тиллени кафедрасыны профессору Айшат Абдуллаева, доцентлери Саида Магьамматова ва Зулайха Агъавова, Россияны Язывчуларыны союзуну членлери Жават Закавов ва Гебек Къонакъбиев, Солтан Янгыюрт школаны директору Зайырхан Телякъаев ва башгъалары жыйылгъан эди. Къонакълар башлап школаны фойесиндеги музей экспонатлар булан таныш болду. Тюрлю-тюрлю музейлерден жыйылгъан алдынгъы, гьали къолланмайгъан уьй алатлар къарагъан адамны ою булан Къазакъ яшагъан йыллагъа гёчюре эди. Фойени биревю янында буса уллу тамгъа Йырчы Къазакъны ва ону гьакъындагъы суратлар, маълуматлар, шаирге багъышлангъан тюрлю-тюрлю шаирлени сатырлары язылгъан.

Къызылюртдагъы 4 номерли орта школаны директору Раиса Ибрагьимова жыйылгъанланы адабият байрам булан къутлады ва шу байрамны этме сиптечи болгъан шагьарны билим берив бёлюгюню методистлери Нургьида Гьюсейновагъа ва Элмира Садрутдиновагъа баракалла билдирди.

Бу адабият ахшамны онгарывда, уста кюйде юрютювде Солакъда ерлешген 5 номерли гимназияны къумукъ тилден дарс береген муаллими Кумсият Къазиевагъа айрыча баракалла билдирме герек. Ол «Ёлдашда» оьтгерилген тил масъалагъа багъышлангъан «дёгерек столну» ортакъчысы, ана тиллерден республика конкурсда 2-нчи ерни алгъан муаллим.

Адабият байрам къумукъланы «гимни» булан башланды. Солтан Янгыюрт орта школада музыка дарсланы береген муаллими Асият Жанавованы ёлбашчылыгъы булан охувчулар йырлар йырладылар.

«Къазакъ бизин къанлы чыкъгъан хатыбыз, Къазакъ бизин къумукъ деген атыбыз» деген адабият композицияда Солакъдагъы 5 номерли гимназияны охувчулары Йырчы Къазакъны кёп шиъруларын охуду. Саида Къарчыгъаева «Йырчы Къазакъгъа», Гюлкъыз Зурхаева «Насип», Асият Бахтиярова «Мен Къазакъман», Рустам Темирханов «Чатакъ йыр», «Сибир йырлар», Камила Исмайылова «Сибирден кагъыз», Юлдуз Азнавурова «Эр уланлар», Халжат Гьажимагьаммаева ва башгъалары жыйылгъанланы къурчун къандырып охудулар.

Байрам оьтгерилген школаны муаллимлери Закир Къурбанаев, Камил Ибрашев ва Гьава Арсланханова Йырчы Къазакъны шавхалны нёкерлери булангъы эришивюн ва шаирни олардан уьст болгъанын суратлап, сагьна гёрюнюш онгаргъан эди. Адабият байрамда башгъа миллетлер де бар эди, шону учун китапхананы къуллукъчусу Людмила Гавриялова жыйылгъанлагъа Йырчы Къазакъны биографиясын, ону яшавун гёрсетеген бёлюклени орусча айтды.

Темиравул орта школаны муаллими Зарият Умаева Къазакъгъа багъышлангъан бир нече шиърусун охуду.

– Машгъур шаирибиз Йырчы Къазакъ оьтген девюрню шаири тюгюл, – деди сёйлей туруп профессор Айшат Зайырханова. – Ону къайсы шиърусун охусакъ да, бугюн язгъанда йимик гьис этесен. Шо буса шаирни гючлю пагьмусу барны бирдагъы керен де исбатлай. Къумукъ халкъны Йырчы Къазагъы бар туруп, биз бир заманда да тилибизни унутмажакъбыз.

Къызылюрт шагьарны билим берив бёлюгюню начальниги Магьаммат Абдуллаев оьтгерилген адабият байрамгъа оьр багьа берди.

Гертиден де, артдагъы заманда тил масъала янгыдан гётериле тура, неге тюгюл де школаларда ана тиллени жумада 2 сагьатгъа тюшюрген. Шо буса ана тиллени муаллимлерин гьазирлевге де четим эте. Кёбюсю ата-ана (2 сагьатдан иш боламы дегенлей) авлетлерин башгъа факультетлеге сала. Яшларда буса ана тиллеге гьаваслыкъ сёне.

Жыйындан сонг бизин булан ёлукъгъан Къызылюрт шагьар администрацияны башчысы Устархан Алюков да билим берив идараларда ана тиллеге бакъгъан «сувукълукъну» эсгерди.

– Шулай жыйынлар, шаирлер булангъы ёлугъувлар эсгерилген кемчиликлени тайдырма кёмек этер, ингдеси, яшёрюмлени юреклеринде ана тилге бакъгъан сюювюн сёнме къоймас, – деди ол.

Биз де ону булан толу рази болдукъ.